కివీ పండులో ఏముంది?
న్యూజిలాండ్‌ పండుగా పేరొందిన కివీ, ఇటీవల మనదేశంతోబాటు ప్రపంచవ్యాప్తంగా దొరుకుతోంది. ఇందులో పోషకాలు ఎక్కువ, క్యాలరీలు తక్కువ. పైగా మిగిలిన పండ్లతో పోలిస్తే సి-విటమిన్‌ శాతం చాలా అధికం. ఒక పండు నుంచి 42 క్యాలరీల శక్తితోబాటు, సుమారు 64 మి.గ్రా. సి-విటమిన్‌, 3 గ్రా. ఎ- విటమిన్‌, 252 మి.గ్రా. పొటాషియం, 17 మై.గ్రా. ఫోలేట్‌, 2.1 గ్రా.పీచూ లభ్యమవుతాయి. ఇంకా విటమిన్‌-ఇ, కెలతోబాటు కాపర్‌, మెగ్నీషియం, కోలీన్‌, ఫాస్ఫరస్‌ కూడా ఉంటాయి. అందుకే ఇది ఆరోగ్యానికి ఎంతో మంచిదని అనేక తాజా పరిశోధనల్లో తేలింది.
* కివీ పండ్లను ఎక్కువగా తీసుకోవడంవల్ల చర్మానికి నిగారింపు వస్తుంది. సూర్యరశ్మి, కాలుష్యం కారణంగా చర్మం ముడుతలు పడకుండా ఇందులోని సి-విటమిన్‌ కొల్లాజెన్‌లా పనిచేస్తూ ఒంటిఛాయను మెరుగుపరుస్తుంది.
* నిద్రలేమితో బాధపడేవాళ్లకి ఈ పండ్లు ఔషధంలా పనిచేస్తాయి.
* సోడియం తక్కువ, పొటాషియం ఎక్కువ ఉండే ఈ పండ్లను ఎక్కువగా తీసుకోవడంవల్ల హృద్రోగాలు వచ్చే ప్రమాదం తక్కువని టెన్నెసీ, వాండర్‌బిల్ట్‌ మెడికల్‌ స్కూల్‌కు చెందిన పరిశోధకులు పేర్కొంటున్నారు.
* పొటాషియం కారణంగా పక్షవాత ప్రమాదం తగ్గడంతోబాటు ఎముక సాంద్రత క్షీణించకుండా ఉంటుంది. మూత్రపిండాల్లో రాళ్లు ఏర్పడకుండానూ ఉంటాయి. బీపీ కూడా తగ్గుతుంది. అన్నింటికన్నా కివీ పండులోని జిగురు కారణంగా మలబద్ధకం లేకుండా ఉంటుందట. కాబట్టి మలబద్ధక బాధితులకి ఇది ఎంతో మంచిది.